Biazai: "Ka Phuan Ṭhan Lai, Ka Nu Dawtnak."
May 07, 2013
Ka Phuan Ṭhan Lai, Ka Nu Dawtnak
~~~~~~~~~~~~~~~~~~~~~~~~
~~~~~~~~~~~~~~~~~~~~~~~~
A thlum khun e, ka nu hmurka,
A nem khun e, ka nu aw-an,
A panh khun e, ka nu mithmai,
A nuam khun e, ka nu inn tual.
Aa dawh khun ko, ka nu kutneh,
Ai rem khun ko, ka nu kutzung,
A thaw khun ko, ka nu ti-rawl,
An iang kho lo, ka nu dawhnak.
Na rethei khun, kei ka caah,
Na thlan ti he, chuk cho na vai,
Din thiam loin, fale ruah ah,
Ni lin ruahsur, rian hrang na ṭuan.
Ka sem kaa in, retheih na in,
Fale ruah ah, chun zaan hngal lo,
Khuaza ruah in, na um tawn kha,
Mitthli za he, thlaza na cam.
Ka sem kaa in, cawmkennak ah,
Chanbau umlo, na ka zohkhenh,
Thaba teima, zaangdi caan zong,
Panh ziahmah in, na ka chawnh biak.
Pawṭam ti haal, dang car caan ah,
Fale ruah ah, ei-din naa sum,
Semmawng rual hmai, mithmai bi ding,
Na sian lo ruang, nun har na tuar.
Baat ni ngei lo, fale caah,
Hnipuan reprai, ngeih lo zong ah,
Fale caah, na rum bik ko,
Chanbau um lo, na dawtnak sung.
Hringtu pa le, fale caah,
Thluachuah minu, na si zungzal,
Cingla rualchan, Mikhual mileng,
An ilawm i, an hna a ngam.
Innchungkhar ah, kheng le bel zong,
An i lawm i, hla dawh an sa,
Hringtu pa nih, a thangṭhat i,
Fale zong nih, a hmaizah khun.
Lungthin thlarau, taksa caah,
Zingnu sinah, thlaza na cam.
Cawnpiaknak tha, na kan pek i,
Zohchunh awkin, na kan nun piak.
Tlanghra dan in, kan um zongah,
Na dawtnak cu, certi kik bang,
kei thinlung ah, a caam cancin,
Philh ni umlo, ka nu dawtnak.
Kum caan liam ii, caan sau hmanhseh,
Vawlei dongh tiang, a hmun dingmi,
Kei ka caah, na dawtnak cu,
A thar chin i, a sunglawi khun.
Fianternak: Hringtu sunghno ka nu (Pi Ni Khun) upat peknak caah ka phan mi biazai a si. Ka biak Pathian cungzingnu nih lunun ngandamnak le nun saunak he lam hruai hram seh.
Tlanghra dan i ummi na fa,
Danny Bawi Bik Thawng
@
D@nny Bawi Thianhlun
Comments
Post a Comment