Nunnak Biatak: Zumtu Le Harsatnak
Nunnak Biatak: Zumtu Le Harsatnak
Minung kan nunnak ah harsatnak, hnahnawh buainak, damlonak, ngaihchiatnak, le thihlonak hna hi kan rak ton hna i atu zongah kan ton cuahmah rih fawn hna. Tuhnu hmailei zongah kan ton rih dingmi hna an si. Cucaah Baibal zong nih, “Vawlei nih harnak an pek hna lai (Johan 16:33)” ah fiang tein a kan cawnpiak. Cun, ati rihmi cu, “Ngaih hmanh u! Cenghngia hrang rual lak i thlahmi tuu bantukin kan thlah hna (Matthai 10:16b)” tiah a ti rih.
Khrihfa tampi nih zumtu kan si i thla kan cam ahcun Pathian nih harnak le buainak vialte chungin kan luat dih lai tihi kan ruah ṭheu tawn. Cucu Baibal nih a kan cawnpiakmi he ai kalh ngaingai. Minung kan nun chung paoh cu hi vawlei nih a chuahpimi harsatnak hna hi kan ton peng rih ko lai.
Cu a si caah, Khrih a zummi nang le kei zong nih kan ifian dingmi cu zumtu nun cu harsat-buainak le lungretheihnak um lo ti siloin hi vawlei nih a chuahpimi harsatnak le buainak vialte tu kha Khrih thawngin teitu kan si. Johan 16:33 ah, “ ‘Nannih nih keimah he nan i pehnak thawngin lungdaihnak nan hmuh nakhnga, hihi kan chimh hna. Vawlei nih hin harnak an pek hna lai sihmansehlaw tih hlah u. Vawlei cu ka tei cang,’ tiah a ti.”
Cucaah, zumtu nang lei kei cu kan nunnak ah harnak um lo ti siloin Khrih thawngin harnak cu a tei khomi kan si i cu harnak chung zongah cun daihnak hnangamnak he kan nun caan a hmang khomi kan si.
Comments
Post a Comment