Nunak Biatak: Mipi Caah Rianṭuan Ti Mi Cu
Mipi Caah Rianṭuan Ti Mi Cu
(Danny Bawibikthawng)
Rev. Dr. Hla Aung, Danny Bawi Thianhlun, Rev. Dr. Henry Siang Kung @ The 2nd GCCF Conference (Kuala Lumpur, Malaysia)
Mipi caah khua kan khang, bia kan chim i rian kan ṭuan kan ti tikah tlamtling ruangah le soisel awk ngeilomi siruangah ṭuan a si lo. Cun, pumpak minung pakhat cio kha an lung kan ton khawh dih hna lai ti zong a si lo. Lai phungthluk ah, “Dawtu za zat, huatu za zat” ti a si bantukin kan mipi caah kan ruah, kan chim i kan tuahmi hna hi a duhtu an um bangin a duhlotu zong a rak um ve hrimhrim lai. Minung cu a kan dawtu nih kan sining nak ṭha deuh in a kan thangṭhat ve bantukin a kan dawlotu hna zong nih kan sining nak in chiakha deuh in a kan thangchiat ve tawn. Sihmanhsehlaw, kan Baibal nih mipi caah rian kan ṭuan tikah kan theih zungzal dingin bia a kan cahmi cu, “Nan tuahmi cu a dihlak in Pathian sunparnak caah siter ko u (1 Korin 10:31b- NIV)” tiah a ti.
Cu thil cu mipi lei zong nih ka ifian dingah a herh tuk hringhranmi a si. Paul zong nih mipi caah rianṭuantu hna a rak cah vemi hna cu, “Zei thil nan tuah paoh ah, minung caah siloin Bawipa caah kan ṭuan ti lungput ngei in, nan lungthin dihlak in ṭuan u (Kol. 3:23)” tiah a rak ti hna.
Cucaah, mipi caah rianṭuan kan ti mi cu pumpak pakhat cio lungtlinter le diriamhter kha siloin a buaktlak in mipi caah ṭhatnak a chuahpi lai tiah ruahmi kha dawtnak lungthin he Bawipa sunparnak ca dingah chim le ṭuan kha a sawh duhmi cu a si.
Comments
Post a Comment