Nunnak Biatak: Minung Kan Kong le Pathian Muisam Keng In Sermi Kan Sinak
Pathian Muisam Keng In Sermi Kan Sinak Nun Hi Than Ter Usih.
2016 CBCUSA Ministers' Retreat (Niagara Fall, NY)
Pathian nih minung cu amah muisam keng in a kan ser. Cu amah muisam keng in ser kan sinak kong le a sining kan i fian khawh ahcun sertu Pathian kong zong kan i fiang deuh.
Mi tampi cu Pathian muisam keng in sermi minung kan sining nak in minung kan tuahsernak le tlamtlin lo nak kong tu kan theih deuh. Minung kan kong tu kan theih deuh tikah Pathian muisam keng in sermi kan sinak cu kan hmu kho ti lo. Pathian nih a kan duh piak mi cu minung kong sawhsawh men siloin amah muisam keng in sermi kan sinak tu kha theih ter a kan duhmi cu a si.
Cucaah minung nih mi nun sersiam kan i timh tikah minung ziaza le tuahsernak hna kha a doh rumro in doh dih hnu ah mi nun sersiam kan itim tawn. A taktak le a ngaingai tiah cun, minung chung i a ummi Pathian muisam kennak nun kha kan hmuh thiam i cu nun cu Pathian bia hmang in kan ṭhawn ter deuh tikah a ṭha lomi minung kan tuahsernak le ziaza vialte cu Pathian muisam keng in sermi kan sinak nih a sersiam i nun thar ah a ser chuah ṭhan.
Minung chung i a ummi Pathian muisam keng in sermi kan sinak tu kha ṭhawn ter le ṭhan ter hna usihlaw minung thisa sinak in a chuak mi tuahsernak ṭha lo le ziaza hna cu amah lo in a lo te ko lai.
Minung kan ṭhatnak le kan i dawhnak taktak hi mit in hmuh khawh mi lenglei kan muisam le kan tuahsernak nak in Pathian muisam keng in sermi kan sinak chunglei tu ah hin a si deuh.
Comments
Post a Comment