Nunnak Biatak: “Ka Pa Sinah Ka Kir Lai”
January 29, 2012
“Ka Pa Sinah Ka Kir Lai”
(Danny Bawibikthawng)
Ka tho lai i ka pa sinah ka kal lai i, “Ka pa, Pathian sin
le na sinah ka sual cang. Na fa ti awk ka tlak ti lo; na kuli pakhat bantukin
ka chia ve ko,” ka ti lai,’ a ti. Cucaah a tho i a pa sinlei kir ah cun aa
thawh. (Luka 15:18-20)
Ramlak ummi zu le va, saram hna le innlak zuatmi sattil
ar-va hna hmanh nih zaanlei ni a hun niam chialmal i khuamuih hram a run i
thawk ah cun anmah le riahhmun cio ah ttin caan an hngalh. Khualtlawngmi zong nih a caan a zaat ahcun inn ah tlun caan
a theih ve. Sihmanhsehlaw, a pa dawtmi fapa hniang vial cu a tu tiang…? A pa
nih a hngawng fak lengmang le a mit
car lengmang in zeitik dah ka fadawt a rak kir lai tiah a cuanhnak le a
hngahnak caan a sau ko cang.
A pa nih a fa le pahnih, a inn hauhruang chung i a chiah hna
cu ttihnung rawhralnak ral chungin an himnak ding caah a si. Fapa hniang nih cun apa dawhnak hauhruang chung i umtthut khuasak
cu har a tituk. Mah duh in nun zalonnak a umlo i nuamhnak a um lo a ti caah a
pa cu a co dingmi ro-hlawnthil cu a hal i apa inn in a chuak. Hi tluk dawt
cukmakmi fapa hniang nih cuti a pa a ti ko cu a pa caah a ngaihchiat le a
lungkuai tuar a har hringhran ko lai.
Pa nih sian lo tuk ko bu ah fapa nih cun a pa pekmi thilri
cu a zuar i a hmuhmi tangkaa cu aa lak i amah aa thimmi lam cu a panh ziahmah. “A hla ngaingaimi
ram ah a kal i khika ah khan duhduh in khua a va sa i a tangkaa cu a va sawksam
dih” (Luka 15:13). Ka nu bia bang, “Chawva ngeihchiah cu dawt le zohkhenh thiam lo ah cun thla a ngeimi
bang lolak in an zuang tawn” a ti. Cu ve bantuk cun “A ngeihmi vialte cu a hloh dih. Cun cu ram ah cun mangttam a tlung
ciammam i a tawro in a tthu” (Luka 15:14). Cukaa ram ah cun ei-khim
hmuh ding tluk kuli hlawh awk hmanh aa hmuh lo. Kaa hlawhfa ve ti ttung i
ttuanman hmanh pek lo cu kuli hlawh a si lo. Sal dirhmun a si cang. Pa inn a um
lio i eiawk a duhduh an pek tawnmi fapa hniang cu a tu ah vok nih an eimi
bekawng hmanh kha ttam len le ei len a duh cang. Van a zoh i asang. Vawlei a
zoh ah a pit. A umnak hmun in aa tthial lo ah cun a thi cang lai. Minung hi voi
khat lawng a nung i voi khat lawng a thi ding kan si. Cucaah Hebru cakuat
nih “Minung hi voi khat kan thi lai i cu hnuah cun
Pathian nih bia a kan ceih lai” (Hebru 9:27) tiah a ti.
Fapa hniang pa bang, minung hi caan tampi cu Pathian dawtnak
hi ttha tein kan ruat tawn lo. Pa Pathian nih a fale rawhral a kan sian lo
ruang i a dawtnak hauhruang chung i a kan chiah hi kan fiang tawn lo i zumtu
dirhmun in dir cu zulh dingmi le sum dingmi thil hna an tam caah nuamhnak le
zalonnak a um lo tiah kan vuivai tawn. Dinfel in cun mi ichuah khawh a si lo
kan ti tawn. Pa dawtnak hauhruang leng ah a chuakmi fapa hniang cu duhherh ngei
lo tlamtlingmi fa dirhmun in ei-din awk ngeilo sal dirhmun ah a phan. An tawro
in a to i zohawktlak loin an ttet-ttiam. Pa dawtnak hauhruang in zam cu ttih a
nung tuk hringhran.
Kan nunnak ah a tlaumi fapa hniang pa bantukin a tlaumi kan um sual maw? Kan umnak hmun peng i kan tthut peng ko a siahcun a tlaumi fapa hniang bantukin kan thi cang lai.
Kan nunnak ah a tlaumi fapa hniang pa bantukin a tlaumi kan um sual maw? Kan umnak hmun peng i kan tthut peng ko a siahcun a tlaumi fapa hniang bantukin kan thi cang lai.
“A donghnak ah cun a lung a hung fim i ‘…. kei vial hika ah
hin rawlttam in ka thi cuahmah. Ka tho lai i ka pa sinah ka kal lai i, Ka pa,
Pathian sin le na sinah ka sual cang. Na fa ti awk ka tlak ti lo; na kuli
pakhat bantukin ka chia ve ko, ka ti lai,’ a ti. Cucaah a tho i a pa sinlei kir
ah cun aa thawh”(Luka 15:18-20). A tlaumi fapa hniang cu
ngaihchihnak he a pa sin lei kir ding ah cun aa thawh. Ngaihchihnak
(repentance) kan timi cu thilsual thilpalh kan tuah ruang i lungnuamhlonak
(regret) kan ngeihmi menmen khi a si lo. Pathian duhmi ngaihchihnak cu kan
tuahmi thiltthalo kha mer tak in Pathian duhnak lei tu ah kir tthan i Pathian
duhnak zulh kha a si.
“Lamhlatpi i a rat lio kha a pa nih cun a rak hmuh; a zaang a
fak ngaingai i a hei tlikhnawh i a kuh i a hnamh” (Luka 15:20b). A
fapa nih a pa a hmu hmasat lo i a pa nih a fapa cu a hmuh hmasat. Kan hmurkaa
in kan chim rih hlan hmanh ah a hmanmi ngaihchihnak lungthin he Pa sin i kir kan rak itimh ah khan lungthin
zohtu le hmutu Pa Pathian nih Amah lungthin chungah a rak kan cohlan cang. Fih
a nung i zoktlak loin a ttet-ttiam cangmi fapa hniang cu Pa caah duh a nung i
aa dawh tthiamtthiam ko. Zeitluk misual, mitlingtlaklo, fihnung tteifiak hmanh
sisehlaw, Pa nih cun a kuh i a hmanh khawh rih. Mizeihmanh ngaihchihnak he Pa sin kan kir ah cun Pa Pathian
nih a kan cohlan khawh tthiamtthiam.
A fapa nih a pa sin i a kir ah hin a pa sinin a hmuh ding ro
zeihmanh a um tilo. Sihmanhsehlaw, a pa nih cun tinco ding ro zeihmanh a ngei
tilomi a fapa hniang cu fa sinak le ro cotu sinak ding caah rak hmanmi kutdonghrolh
cu a pek tthan. Zohawktlak tilo tiangin a ttet-ttiam cangmi a hnipuan cu a
phoih ter hna i zohchia khenhhru in a rak ummi pum cu a tthabik puan in a khuh
a aih ter. A rawp cangmi le a rawk cangmi
kedan hmanh a ngei tilomi a fapa cu kedan thar a danh ter tthan i
lunglawmhnak caah a thau bikmi cawfa in puai a tuah piak rih.
Sualmuilak ah a tlawngleng i a thi cuahmahmi nang le kei cu fa
dirhmun ah kan itlak ti lo. Sihmanhsehlaw, kan sualnak le kan thih cuahmah nak
hmun in kan lung kan ifim ter i ngaihchihnak he Pa sin kan dir ve ah cun Pa
Pathian nih Jesuh Khrih thawngin fa dirhmun ah a kan cohlan tthan lai. Fa a
simi nih cun pa ro a co bang nang le kei zong kanpa ro a simi zungzal nunnak le
vanram cu kan co ve lai. Kan sualnak ruangah fihnung tteifiak in zohtlaklo
dirhmun sihmanh usihlaw Pa Pathian nih Khrih Jesuh thawngin kan hmuhmi khamhnak
puan sung in a kan thuam cang. Lei cung caan tawi te kan nun chung harsatnak
phun zakip kan tontik ah kan intuar khawhnak ding caah kedan tthabik
ruahchannak le zumhnak a kan pek fawn.
Fapa tlau hmanh a lungfim i pa sin ah kir aa thawh cang.
Nang le kei zong kan tlaunak hmun in Pa sinah kir ve caag hna usih!
Comments
Post a Comment