Biazai: "Chankhat Chuak Ah!"
Chankhat Chuak Ah!
(Danny Bawibikthawng)
February 02, 2012
Nu chung chuak cio, mihrin fa cio,
Zeihmanh lo he, hi lei cuna ah,
Hawi hrin bang in, kan chuak cio ko,
Kan i dang lo, hi leicung ah.
Chungchuak fa cio, kan hung tthang i,
Khua kan sa i, kan tlawng kan leng,
Van arfi bang, nu le pa nih,
Cerlian ni bang, zohthla cio hna.
Khuptthi rual nih, chungmang fek he,
Merem thiam lo, khupthal mer in,
An cawlcang mu, chunzaan hngal lo,
An zun hrim lai, tuhmi theipar.
Khua caan aa thleng, theih manh umlo,
Caan nih a liam, tlaih khawh loin,
Mit tthep kar ah, val rual leng rual,
Hmunkip vai in, dir hmun aa dang.
Hrin ah voi khat, thih ah voi khat,
Cu caan chung ah, thawh chuah mi nih,
Nunnak sullam, i fian lo cun,
Chankhat chuak nun, kan vaivuan ee.
Chankhat chuak ah, lungfim tein,
Sullam ngei nun, kan cawn ding si,
Chankhat chuak ah, Kan caan sunglawi,
Hlohlak men ding, Kaa siang hrim lo.
Chankhat chuak cio, an ti men lai,
A ciocio ah, kan i lo lo,
Kan nun sullam, man ngei ding in,
Kan hman cang ee, chankhat chuak ah.
Chankhat chuak cio, kan ttial tuanbia,
Nunnak in ee, caan tawi chung ah,
A menmen ding, dirhmun ah cun,
Chankhat chuak ah, kaa siang hrim lo.
Chankhat chuak ah, ka dawt hrim lai,
Ram le miphun, nunnak pek in,
Kan ttial tuanbia, aa dawh khun ee,
Thinlung chungah, caamcin ding in.
Chan khat chuak ah, kan i dang ee,
A ciocio ah, kan i khat lo,
Eibar chuak lo, si lai ding cu,
Kaa siang hrim lo, chankhat chuak ah,
Ka nolh tthan lai, voi khat tein,
Chankhat chuak ah, kan i dang lo,
Hei ti men i, hmantlak lomi,
Si lai ding cu, ka ruat kho lo.
Nolh rih ko ning, ka ttang chung bia,
Ram le miphun, sersiamnak ah,
Hmantlak lomi, si lai ding cu,
Kaa siang hrim lo, chankhat chuak ah.
Comments
Post a Comment