Nunnak Biatak: "“Kan Siarem Ko Lai Maw?”

“Kan Siarem Ko Lai Maw?”
(Danny Bawibikthawng)

“Ka pupa hna thlan umnak khuapi cu a rawh ko i kutka cu mei nih a kangh dih hna tikah hin, zeicahdah hmaichia loin ka um hnga?” (Nehemiah 2:3)


Nehemiah cauk cu 430 B.C. tluk ah Nehemiah nih ttialmi a si tiah ruah asi. Nehemiah cu Judah ram mangki bawi asi. Amah cu Persia siangpahrang Artazaksis pennak lio caan ah Siangpahrang  hrai putu a rak si i siangpahrang lung a rak ton caah Siangpahrang hmai ah mithmai a hmumi a rak si. Hi cuak nih chimmi cu Nehemiah nih 445 B.C. ah a rawkmi Jerusalem kulhnak vanpang remh tthannak ding caah Jerusalem ah a kir tthannak kong kha a ttial.

Nehemiah cu Persia ram ah him tein aum i siangpahrang inn ah nuam le tlamtling tein khua asa ko nain an ram i aum rihmi a miphun hawi hna le Jerusalem khua kong kha a siaherh peng rih caah a miphun hawi a simi hna kha thawngpang a hal hna. Cutik ah annih nih an thawh i, “Saltannak chungin a luatmi khika ram i a nung rihmi hna cu harnak nganpi chung le ningzahnak chungah an um ko; Jerusalem kulhnak vampang hna cu an cim dih i a kutka hna cu mei nih a hrawh dih hna,” (1:3) an ti. Cu kong a theih hlan ahcun Nehemiah cu a mit hmai a chia bal lo. “Hi hlan ahcun a hmai ah khan ka ngaih a chia bal lo.” (2:1). Sihmanhsehlaw, cu bia cu a theih tikah cun “ka tthu i ka ttap i saupi ngaihchia in ka um i vancung Pathian hmaiah khan rawl ul lengmang le thlacam lengmang in ka um” (1:4) tiah a ti.

Pumpak amah caah cun zeizong vialte cu tlamtling cikcek le rem khitkhep tein umko hmanhsehlaw a miphun le a ram harsatnak le rawhnak chungah a um ko kha a theih tikah Nehemiah cu aa nuam kho tilo. A miphun le ram a dam lo tik ah Nehemiah cun ngaihchia le lungrethei in a um. Lungnuam lo le ngaihchia tukin a ummi kha Siangpahrang pa nihcun a hmuh a theih tik ah “Zeicahdah na hmai a chiat? Na zawt fawn ttung lo? Zeidang siloin, na lung chungin na ngaih a chia i a si ko hih” (2:2) tiah ti. Nehemiah cu a miphun hawi hna harsatnak le a khua a ram a dam lo ti thawng kha a theih tik ah lenglei hmurkaa lawnglawng siloin a chunglei lungthin taktak in a ngaih a rak chia.  Cucaah, Nehemiah nih siangpahrang pa cu a thawh i, “Siangpahrang cu zungzal in nung ko seh! Ka pupa hna thlan umnak khuapi cu a rawh ko i kutka cu mei nih a kangh dih hna tikah hin, zeicahdah hmaichia loin ka um hnga?” (2:3) tiah a ti.  Atuah kannih kan Chin miphun kan sining le kan ram a rawh cuahmah ko le a dam lo kha kan hmuh tikah hin kan lenglei lawng siloin kan chunglei taktak in kan ngaih a chia maw? Ram le miphun a daw taktakmi Nehemiah nihcun ram le miphun a rawh ko le a dam lo kha an zoh sawhsawh kho lo. Lungfak loin a um kho lo. Thlacamnak in ka bawmh ko cang hna i a za ko a ti lo.

Cu tikah, Nehemiah nih a ngeihmi chunglei ngaihchiatnak kha siangpahrang nih a hmuh tikah Nehemiah cu a thawh i, “Zeidah na ka hal duhmi asi?” (2:4) tiah a hal. Nehemiah nihcun, “Siangpahrang duhnak asi i na hmaiah na sal nih hin mithmai ttha ka hmuh a siahcun, ka va remh nakhnga, Judah ram ka pupa hna thlan umnak khuapi ahcun ka kalter tuah” (2:5) tiah a ti. Cu hnu cu, Nehemiah cu a damlomi a ram le a miphun thlopnak ding caah aa thawh i Jerusalem lei ahcun a kir. Ram le miphun, Khrihfabu le innchungkhar a daw taktakmi nihcun kan ram le miphun, kan Khrihfabu le kan inncungkhar a rawh ko le a dam lo komi hi tthu sawhsawh in an zoh sawhsawh kho lo. Thla kan cam cang tiah thlacamnak lawng an irinh bal lo. Nehemiah bangin an tuahsernak hrimhrim in miphun le ram, Khrihfabu le innchungkhar an dawtnak kha an langhter.

A damlomi le a rawk cangmi,kan ram le miphun, Khrihfabu le innchungkhar thloptu dingah Nehemiah bantukin Pathian nih hman a kan duh ve.

.....†††......

Comments

Popular posts from this blog

When Neutrality Is Not an Option: Why the Church Must Use Its Resources to Defend Christian and Ethnic Minorities in Myanmar

The Strength to Forgive: Building Unity in a Divided Myanmar (By Danny Bawibikthawng)

Mother’s Day: Honoring Our Mothers as a Sacred Pathway to God’s Blessing