Nunnak Biatak: A Kan Hruaitu Hna Mipi Nih Bawmh le Dirkamh Hi Kan Miphun Nih Teinak Hmuhnak A Si!
January 08, 2012 Nunnak Biatak: A Kan Hruaitu Hna Mipi Nih Bawmh le Dirkamh Hi Kan Miphun Nih Teinak Hmuhnak A Si! Danny Bawi Thianhlun “Moses cu a ban tha kha a dit tikah Aaron le Hur nih khan lung pakhat an lak i a cungah cun an tthutter i annih nih khattelei veve in an dirkamh i a ban cu an doh hna. Ni a tlak tiang a ban cu an doh hna i Joshua nih cun Amalek mi cu a tei dih cikcek hna hna. Exodus 17: 12-13 Khrihfa nih kan ngeihmi Baibal Cahlun hi hruainak phungphai mit in hei cuanh tik ah nihin kan i hruainak zong ah zohchunh ding le i cawn ding awktlak thil tampi a um tihi hmuh khawh a si. Hruainak ka titik ah biaknak lei lawng siloin miphun pakhat nih a lamkip in kan tthancho khawhnak ding caah kan herhmi ramkhel rianttuannak le a dangdang rianttuannak caah aherhmi hruainak hna zong kha chim duhmi cu a si. Pathian nih a thimmi hna Israel miphun caah hruaitu a pek zungzal hna. Cu nih a langhtermi cu Pathian hi a fale minung hna hmang in a sunparnak langhter...