Nunnak Biatak: Ṭhitumnak Timi Cu
Zeicaahdah Nupi Le Pasal Hi Kan Ngeih? (Danny Bawibikthawng) Nupi le pasal ngeih timi cu Laimi nih “Ṭhitumnak” tiah kan ti. Vunrang pawl nih mirang holh in “Marriage” tiah an ti ve nain kannih he kan i fianning hi cu aa dang kho men. Ṭhitumnak timi biafang kan hman tikah kannih Chin miphun nih cun tluang ngai le fiang ngai in nu le pa kha zungzal caah a fekmi biakamnak he pumkhat sinak hrawm dingin an i ṭhi-um tiah kan ruah khawh colh. Sihmansehlaw tu chan mi tampi nih cun ṭhitumnak hi nu le pa lawng siloin pa le pa, nu le nu zong a si kho tiah an pom. Kha ti lei pang kha cu atu ah cun langhter duhmi a si lo. Zeicaahdah nupi le pasal kan ngeih timi kong tuhi kan Baibal nih zeitindah a kan cawnpiak timi hoih lei in van langhter ka duh. Zapi kan thei cio bangin ṭhitumnak cu minung nih siloin Pathian nih a rak thawkmi a si. Ṭhitumnak caah khuakhang laireltu hi amah Pathian a si fawn. Ṭhitumnak cu nu le pa pahnih karlak ah a hmun dingin sermi a si. Pathi...