Nunnak Biatak: "Kan Theih Ciami Tuhi I Nunpi Cang Hna Usih."
January 15, 2012 "Kan Theih Ciami Tuhi I Nunpi Cang Hna Usih." (Danny Bawi Thianhlun) “A bia kan theih paoh ahcun a za, tiah nanmah le nanmah i hleng len hlah u. A bia cu tuah tu in tuah deuh u.” (Jeim 1:22) Kumzabu 1 lio i upat zumhawktlak in Judah miphun ttuanbia ttialtu Josephus (1 st - century Jewish historian) nih Jeim cu Khrih a zumhnak ruangah A.D. 62 ah an thah tiah a ttial. Cu caah Jeim cakuat cu A.D. 62 hlan ah ttialmi a si tiah theih khawh a si. Jeim cakuat hi vawlei khuaza aa tthekmi zumtu hna sinah kuatmi a si i hi cakuat hi ttha tein zoh tik ah adang Baibal cathar (cauk) hna he a hun idang ngaingai tihi hmuh khawh a si fawn. Zeiruang tiah, zumtu hna nun ah a tthami tuahsernak a herh zia kha fak ngai le biapi tuk in a chim caah a si. Jeim cakuat hi kan rel tik ah le kan i cawnpiak tik ah zumtu tampi hna nih kan i buaipi ngaingai tawn. Zapi zaraan nih kan i buaipimi le kan theihfian khawh lomi cu khamhnak kan hmuhnak ding caah zumhnak maw a biapi deuh?, tu...