Pastor Dirkamhtu Bu nih Aa Tinhmi Thil Pahra (The Ten Purposes of the Pastors Support Group)

CHIN BAPTIST CHURCHES USA
Ministers Council

Pastor Te Dirkamhnak Bu  (Pastors’ Support Group)

by Danny Bawibikthawng

“Pakhat le pakhat nan thilrit kha i chawng u law cuticun Khrih nawlbia kha nan zulh a si lai.” (Gal. 6:2)

Zeiruangah Pastor Dirkamhnak Bu Cu Kan Herh? (Why Do We Need a Pastors Support Group?)

Pastor rianṭuannak (pastoral ministry) cu a thiangmi rianṭuannak caah Pathian kawhnak sihmanhsehlaw mi pakhat lawng nih ṭuan dih dingah kawhmi rian a si lo. Pastor nih phung an chim, mipi an hruai, nunnak caah ruahnak an cheuh, thla an cam, buainak an tawlrel, chungkhar an zohkhenh, midang nih an hmuh  khawh lomi thilrit tampi an phorh. Midang thazaang peknak caah an nunnak le sining an hman, asinain pastor hna zong nih thlacamnak, thazaang peknak, hawikomhnak, fim cheuhnak le zawnruahnak he zohkhenhnak an herh ve.

Pastor cu tuurun zohkhenh dingah kawh a si nain Pastor cu amah lawngin thilrit kip phur dingin kawh a si lo. Cathiang nih, “Pakhat le pakhat nan thilrit kha i chawng u law cuticun Khrih nawlbia kha nan zulh a si lai.”(Gal. 6:2) tiah a kan cawnpiak. Hi nawlbia hi Khrih pum chung i a ummi hna caah a si bantukin pastor hna zong nih an herh ve.

Pastor nih cu a herhnak cu a tak a si. Hlathlaibu pakhat a simi Barna nih 2015 i a langhter ningah U.S. Protestant pastor chungin 42% hna cu lungzor thlavai kiang in le  hawi rep hawi ṭha ngei loin (loneliness and isolation) an um i 2022 ahcun  65% ah an karh a ti.  Cu caan chung lila ah cun, thlakhat ah voi zeimawzat hawikomhnak asiloah cawnpiaktu hna sin in pumpak thlarau lei bawmhnak a hmumi pastor pawl cu 37% in 22% ah an zor ti a si.  Lifeway Research zong nih thinlung lei thilrit ruangah le lungdongh ruangah pastor riantuannak a chuahtakmi pastor hna cu 2015 ah 10% an si i 2025 ah cun  22% an si tiah a langhter. 

Hi thil hmuhmi le boruak nih fiang tein a langhter mi cu Pastor zong nih a dang pastor bawmtu hawikom ṭha an herh ve tinak a si. Kanmah he thla a cam ṭi dingmi, kan bia a kan ngaih piaktu ding le zumh ngam in biaruah khawhmi, thazaang a kan petu dingmi, harnak le lungretheih caan ah thazaang a kan pe i a kan dirkamh kho dingmi bochantlak hawikom ṭha cu kan rak herh ve hrimhrim. 

Zeicahdah hi kong cu Chin Mipem Khrihfabu hna caah a biapit? (Why This Matters for Myanmar Immigrant Churches)

U.S ah a ummi Chin mipem pastor hna i kan rianṭuannak cu pulpit cung tiang lawng in a dih lo. Holh le nunphung, ruahnak le sining an khat lomi hna lak ah kan mipi nih a herhnak rian kip ah caan pek in bawmh le tawlrel a herh tikah kan i khinhmi rian hi a rit ngaingai. 

Kawlram dohthlennak ruangah ramchung kahdohnak a chuak. Inn le lo men lawng siloin, khua tampi a rawk, nunnak tam tuk a liam. Himnak ruahnak inn le lo zamtak in hmunkip kaakip ah kan i ṭhek.  UNHCR nih a langhter ning ahcun 2025 dongh lei ah minung 3.6 million renglo cu ramchung ah an zam, a dang 1.6 million cu ramleng ah Myanmar ralzam le dornak a kawlmi an um a ti.  Cu lakah cun Chin miphun zong nih fak khun in kan tuar.

Cathiang nih a kan chimhmi cu: “Pum chung nge pakhatkhat nih fahnak a in ahcun a dang nge vialte zong nih khan an rak inpi ve (1 Kor. 12:26)” tiah a ti. Kan miphun thisa khat nih an tonmi harnak le intuarnak cu i theihter lo khawh a si lo. Cucaah, hi pastor hawikomhnak le dirkamhnak bu hi U.S. um pastor le khrihfabu hna thazaang peknak ca tiang lawng si loin, ram chung ram leng ummi kan miphun le ram caah a herhmi rian ṭuannak caah a rak herh i a biapimi ah a hung cang. Atu zongah kan tuah cuahmahmi hna cu kan kaltakmi kan ram ah miphun caah thlacamnak in siseh, harnak a tongmi kan unau hna caah a lamkip in kan tuah khawhmi  bawmhchannak in siseh kan cawlcang cuahmah.  Kan umnak ram i dang hmanhsehlaw Khrih le miphun ah pum khat kan si. 

Pastor hna zong kan rianṭuannak khrihfabu i dang hmanhsehlaw Pathian pakhat caah  rainṭuantu kan si. Kanmah le kanmah i bawm hna usihlaw Bawipa ram caah kan kut ṭhawnter hna u si. Pum khat kan si i hmunkhat ah kal ṭi ding kan si. 

Pastor Dirkamhtu Bu nih Aa Tinhmi Thil Pahra

(The Ten Purposes of the Pastors Support Group)

1. Pakhat le pakhat i theih le a dammi pehtlaihnak ser (To Know One Another and Build Genuine Relationships)

Minung hi kan theih bal lomi hna cu kan bawm kho hna lo. Min le rianṭuannak khrihfabu tiang i theih men lawng a za lo. Hmual ngei tein kan i bawmh i kan i dirkamh khawh nakhnga  naihniam deuh le ṭha deuh in kan i theihhngalh a herh. 

Kan i tinhmi cu Bawipa rianṭuantu pastor nih a herh lio caan i pakhat le pakhat thlacam pitu, ruahnak le fimnak cheutu, thazaang petu le zumhawktlak tein bia kan ruah khawhmi rianṭuan hawi  pastor ṭha rak ngeih ding kha a si.  Pathian bia zong nh “Pahnih cu pakhat nakin an ṭha deuh… Zeicahtiah pakhat kha a tluk sual ahcun pakhat nih khan a bawmh khawh (Phungchimtu 4:9-10) ” tiah a canwpiak. 

2. Pakhat le Pakhat Thlacam Piakding (To Pray for One Another)

Pastor nih hruaitu tuuruun vialte caah thlacam piak a si. Cu ve bantuk in Pastor zong nih thlacampiaktu an herh ve. Cucaah thlacamnak cu hi hawikomhnak (Pastor Suppor Group) ah a hrampi pakhat a si awk a si. Pastor pakhat nih a harsat tikah thla kan campiak a herh. Pastor pakhat nih a harmi biakhiahnak a ton tikah thla kan campi a herh. Khrihfabu pakhat nih Pathian thluachuah kan hmuh tikah hmunkhat te ah kan i lawmhpi awk a si. “Pakhat le pakhat thla i campiak u (Jeim 5:16) ” tiah Pathian bia nih a kan cawnpiak.

3. Pakhat le pakhat thilrit i chawng awkah (To Carry One Another’s Burdens)

Pastor paohpaoh nih zapi nih hmuh khawh lomi thilrit kan phorhmi tampi a um. Cu hna cu innchungkhar lungretheihnak, khrihfabu buaibainak, chawva harnak, soiselnak, biakhiahnak har, lungrawhnak, le thlarau thazaang dernak hna tbk an si. Cu thilrit hna cu Pastor pakhat lawng nih phorh awk a ṭha lo. Kan thilrit hna cu kan i chawn cio tikah a dang pakhat caah a zaang deuh tawn. Pathian bia nih a kan cawnpiakmi cu, “Pakhat le pakhat nan thilrit kha i chawng u law cuticun Khrih nawlbia kha nan zulh a si lai (Galati 6:2)” tiah a ti. 

Kan lak i pakhatkhat nih harnak le lungretheihnak a ton tikah dawtnak tak he cu thilrit cu kan i chawn cio ve ding hi a biapi tuk hringhran. 

4. Riantuannak ah hmuhtonmi, fimnak le thilṭha hna i hrawm ding (To Share Ministry Experiences, Wisdom, and Resources)

Pastor paoh nih nun ṭhannak caah cawn dingmi thil kan ngei dih cio. Pastor paoh nih midang cheuh dingmi thil ṭha kan ngei fawn. Hruainak ah siseh, zultu sinak ah siseh, thawngtha chimnak ah siseh, buainak remhnak ah siseh, mino riantuannak ah siseh, chungkhar riantuannak ah siseh, mission riantuannak ah siseh, pastor zohkhenhnak ah ah siseh, kan hmuhtonnak hna nih pakhat le pakhat thazaang  peknak, fimnak le ruahnak cheunak tbk peknak in nun kan i hrawm i kan i bawm kho.

Baibal nih, “Thir nih thir a harter, mi zong nih midang fimnak kha a harter ve.. (Ptb. 27:17) ” tiah a kan hmuhsak. Kanmah lawngin zeizong vialte cawn dih le thiam dih cu a si kho lo. Sihmanhsehlaw kan ngeihmi le kan thiammi kan i hrawm ahcun kan rian ṭuannak ah kan dam in kan ṭhawng deuh lai

5. Him tein biaruah khawhnak le bia i ngaihpiak khawhnak hmun pek  (To Provide a Safe Place to Talk and Be Heard)

Minung sinak ah kan lungretheihnak le thilrit chimphuan khawhnak hmun hi a har ngai te. Sihmanhsehlaw cu hmun cu pastor cio kan nun ah um a herh. Pastor te hi midang hruaitu le thazaang petu kan si caah kan thazang a ṭhawng lai tiah ruah a si tawn. Asinain a caan ahcun pastor zong a tha a ba tawn i thazaang pek, thlacam piak, tbk a herh ve tawn. Pastor zong nih bawmh kan herh timi chimphuan khawh hi a biapi tuk. 

Cucaah hi group sermi a biapi tuk. Hi group cu zumhawktlak, lenglei chimphuan ṭhan a hmang lomi, zawnruahnak le zangfahnak, dinfelnak hmun a umnak hmun a si awk a si. Zeitikhmanh ah bia alnak, zuamnak le biaceihnak a si awk a si lo. Caan tampi cu kan thilrit a zaan khawh nakhnga a kan bawmtu hi bia a kan ngaihpiak khotu hawikom ṭha hna an sit awn. 

6. Pastor pawl kha an kawhnak ah teimak tein um khawhnak ding caah thazaang peknak (To Encourage Pastors to Persevere in Their Calling)

Pastor riantuannak ah hin lawmh caan le lungdonghnak caan a um tawn. Kan lungdongh caan ah Pathian bia in thazaang a kan pe ṭhantu khi kan herh lengmang. 

• Na lungdong hlah.

• Pathian cu zumhawktlak a si.

• Har ko hmanhseh, Bawipa kawhnak cungah zumhawktlak tein um ko. Bawipa nih a theih dih ko, tbk in thazaang pe tu hawiṭha kan herh. 

“Pakhat le pakhat thazang i pe u law i bawm u.” (1 Thes. 5:11)

7. Thlarau le Thinlung Ngandamnak Thawnternak caah (To Strengthen Spiritual and Emotional Health)

Pakaht le pakhat kan i chawnhbiak tik zongah, “Nan khrihfabu zei a lawh?” tbk lawng i hal siloin “Na dam maw, zeidah na lawh” tiah riantuantu hawi hna cu siaherhnak taktak he bia kan i hal ding hi a biapi tuk. 

A ngandammi khrihfabu riantuannak a um khawh nakhnga thlarau lei le thinlung lei ah a dammi hruaitu a herh. Pastor pawl nih thlacamnak, Baibal relnak, dinh caan, hawikomhnak, tuanvo laknak, thazaang peknak, le, a herh tikah, aa tlakmi thiamsang zohkhenhnak an herh ve tihi kan pemh hrimhrim a herh. 

A thawngmi khrihfabu nih a dammi pastor an herh. (Strong churches need healthy pastors)

8. Kawlram um Kan Unau Hna He Lungrualnak Thawnter Le Dirpi Ding (To Strengthen Unity and Stand with Our Brothers and Sisters in Myanmar)

Kan khuasaknak le umnak khrihfabu i dang hmanhsehlaw Khrih le miphun ah pumpak kan si i CBCUSA ah chungkhar khat kan si. Cathiang nih a kan cawnpiak bangin,  “Pum pakhat le Thlarau pakhat… Bawipa pakhat, zumhnak pakhat, tipil innak pakhat.” (Efe. 4:4-5)

Pastor karlak ah pehtlaihnak fek le lungrualnak  a um ahcun khrihfabu hna karlak ah lungrualnak ler riantuannak ah thawnnak a um. Cu kan lungrualnak le thawnnak nih cun kanmah ca lawng siloin dohthlennak ruangah harnak nganpi a tongmi kan miphun ca zongah riantuannak tha tampi a chuahpi khawh. 

Dawtnak he hmunkhat ah thla kan cam ti lai, Zawnruahnak he thawngpang kan i thanh hna lai, rian tha kan tuannak ah thazaang chuah cio dingin pakaht le pakhat kan i forhfial lai. Cucaah kan pemnak hmun i kan thluachuahnak vialte hi kanmah ca zongah si ti loin kan miphun haw hna kan hrawm ve hna tikah Bawipa zong kan cungah aa lawm lai. Cu nih cun America ram ah kan um nain kan ram le miphun hawi hna  cu kan philh hrim lo ti kha harnak a dongmi kan miphun nih an theih lai i an caah thazaang a cang lai. 

 

“Phung pakhat nih fahnak a in ahcun, a dihlak in fahnak an ing ve.” (1 Kor. 12:26)

9. I thekdarhnak nakin pakhat le pakhat i zawnruah zohkhenhnak nunphung ser (To Develop a Culture of Mutual Care Rather Than Isolation)

Kan lak i pastor rianṭuannak nunphung hi a ṭhatnak lei in kan  thlen a herh. 

• “Hi thil hi keimah lawng nih ka phorh a hau” timi in

 "Kan phorh ṭi lai" tiah thlen kan hau.

• “Hihi na buainak a si” timi in 

 “Na thilrit cu kan thilrit a si ve” tiah kan thlen a herh.

• “Mah le khrihfabu cio caah ka nung” timi in

 "A rian thiang kan ṭuan piakmi Khrih ah pumkhat kan si” timi ah kan kal a herh. 

Cu nunphung dawh cu thlacamnak, pakhat le pakhat i zumhnak, dawtnak he riantuan ṭinak, le pakhat le pakhat i zawnruahnak in kan i zohkhenhnak ahcun kan ser khawh lai. Cu nih cun pumpak lawng siloin khrihfabu zong a damter deuh lai. 

10. Hmailei Pastor Thazaang Peknak Caah (To Strengthen the Next Generation of Pastors)

Hi Pastor Dirkamhnak Bu (Pastors Support Group) nih aa tinhmi cu kanmah le kanmah dirkamhnak ca tiang men lawng a si lo. Hmuhtonnak a ngeimi pastor hna nih fimnak hrawmh le cheuh awk an ngei. Mino deuh pastor hna nih thazaang thar le ruahnak thar tampi an chuahpi khawh. Cuticun pakhat le pakhat kar ah pehtlaihnak ṭha kan ngeih i dawtnak he kar kan hlan ṭi khawh ahcun hi nak in Bawipa ram le a sunparnak caah rian kan ṭuan ṭi kho deuh lai.

Paul nih Timote cu hitin a ti. “Keimah sinin na theihmi cu… zumhawktlakmi hna kha va pe hna law midang zong a cawnpiak kho ve hna lai (2 Tim. 2:2).” Kan i tinhmi cu nihin pastor pawl an nun khawh nakhnga bawmh sawhsawh hi a si lo. Thaizing Pastor te hna zong zumhawktlak tein rian an ṭuan khawh nakhnga timhtuah le bawmchannak caah saduhthahnak he hi group cu ser a si.  

Hi bu cu Khrih hrambunh in thlacamnak he kal dingin sermi hawikomhnak bu a si. Pakhat le pakhat kar ah zumhnak ser in kar kan hlan ṭi khawh nakhnga bawmchantu dingah sermi bu a si. Kanmah chungah biaruahnak kan ngeihmi thil hna a himnak hmun a si khawh nakhnga sermi bu a si. Pakhat le pakhat thazaang peknak, hawikomhnak, cawnpiaknak, fimnak le ruahnak i hrawmnak hmun si dingah saduhthahnak he sermi a si. Rianṭuannak caah bawmchantu a si dingmi bawmhnak le thil ṭha hna i hrawmnak hmun a si. Pakhat le pakhat thilrit kan i chaannak hmun a si. 

Hi Pastor Dirkamhnak Bu nih aa tinhmi a muru cu:

1. Pakhat le pakhat thlacam ṭi ding.

2. Pakhat le pakhat bia i ngaihpiak ding.

3. Pakhat le pakhat thazaang i pek ding.

4. Pakhat le pakhat sin fimnak le nun cawnnak ngeih ding.

5. Pakaht le pakhat thilrit i chawn ding.

6. Harnak caan ah i dirkamh ding.

7. Bawipa rianṭuannak ah hmun khat te i ṭhan ṭi ding le

8. Lungrual tein hmunkhat ah Bawipa rian ṭuan ṭi ding 

hna an si. 

Vision

CBCUSA Pastor vialte pakhat le pakhat kar ah Khrih chungah a hngatmi le a dam i a fekmi pehtlaihnak ser in pakhat le pakhat: 

• Thlarau lei in thawnter (Spiritually strengthened)

• Lungthin  thazaang lei in bawmh. (Emotionally supported)

• Pehtlaihnak ṭhanter (Relationally connected)

• Fimkhur tein timhtuahnak ngeihter (Wisely equipped)

• Zumhawktlak tein thazaang i pek (Faithfully encouraged)

• Thlacamnak he i dirpi (Prayerfully sustained)

• Riantuannak ah lungrual tein um (United in mission)

hna hi an si.

  Zeicahtiah pastor pawl nih pakhat le pakhat naihniam tein an i theih tikah zumhnak a karh. Pastor te nih thla an cam ṭi tikah zumhnak a ṭhang. Pastor te nih pakhat le pakhat thilrit an i phorhpi tikah Khrih dawtnak a lang. Pastor nih fimnak an i hrawm tikah, riantuannak hna cu an fek deuh. Pastor pawl hmunkhat ah an dir tikah Khrihfabu hna an fek chin lengmang. Kawlram ah harsatnak a tuarmi hna kan vun i cinken tikah, kan lungrualnak cu zawnruahnak tuahsernak ah a cang. Hmuhtonnak a ngeimi pastor pawl nih mino deuh pastor pawl an invest tikah, a ra laimi chanthar cu an tthawng deuh. Khrihfa riantuannak cu mah lawng umnak khualtlawnnak si dingin timhmi a si bal lo.

Chirhchanmi Hna

Barna Group. “7-Year Trends: Pastors Feel More Loneliness & Less Support.” July 12, 2023.

Lifeway Research. Pastor Attrition 2025: Comparison to 2021 and 2015. Nashville: Lifeway 

Research, 2025.

United Nations High Commissioner for Refugees (UNHCR). “Forced Displacement Crises: 

Myanmar.” 2026.